ഭരണിക്കാവ്
ബ്ലോക്ക് പഞ്ചായത്ത്

ഭൂപ്രകൃതിയും പ്രകൃതിയും

പാരമ്പര്യവും പുതുമയും സമന്വയിക്കുന്ന നാട്

പഴമയിൽ കാലുറപ്പിച്ചു നിൽക്കുന്ന ഭൂപ്രകൃതിയും പുതുമയിൽ ആവേശം കൊള്ളുന്ന ജനപ്രകൃതിയും — ഇതാണ് ഭരണിക്കാവ് ബ്ലോക്ക് പഞ്ചായത്തിന്റെ നഖചിത്രം.

പ്രകൃതി കനിഞ്ഞനുഗ്രഹിച്ച കേരളത്തിന്റെ ഒരു ചെറുഖണ്ഡമായ ഈ പ്രദേശം ഭൂമിശാസ്ത്രപരമായി കേരളത്തിന്റെ ഒരു ഏകദേശ പതിപ്പാണെന്ന് പറയാം. തീരപ്രദേശത്തോട് ചേർന്നുകിടക്കുന്ന ഇടനാടാണെങ്കിലും, കിഴക്കൻ ഭാഗങ്ങളിൽ മലനാടിന്റെ ചില സ്വഭാവങ്ങൾ കാണപ്പെടുന്നു. പടിഞ്ഞാറൻ ഭാഗം തീരസമതലത്തിൽപ്പെടുന്നു.

എന്നാൽ പ്രകൃതി മറന്നുപോയ ഒരു കാര്യമുണ്ട് — ഒരു വലിയ പുഴയോ പ്രധാനപ്പെട്ട ജലാശയമോ ഈ പ്രദേശത്തിന് നൽകിയിട്ടില്ല. ഈ കുറവ് നികത്തുന്നതിനാകാം സമൃദ്ധമായ ഭൂഗർഭജലസ്രോതസ്സുകളും നിരവധി ചെറുജലാശയങ്ങളും തോടുകളും ഇവിടെ ലഭ്യമായത്. അവയെ നിറയ്ക്കാൻ സമൃദ്ധമായ കാലവർഷവും പ്രകൃതി നമുക്ക് നൽകുന്നു.

മാറുന്ന ഗ്രാമീണ ഭൂപ്രകൃതി

പച്ചപ്പ് — എവിടെയും അതുതന്നെ.

കുന്നുകൾക്ക് കുടചൂടിയ ഫലവൃക്ഷങ്ങളും താഴ്‌വാരങ്ങളിലെ നാണ്യവിളകളും സുഗന്ധപച്ചക്കറിവിളകളും, ഒരു കാറ്റടിച്ചാൽ ആയിരം അലമാലകൾ സൃഷ്ടിച്ചിരുന്ന ചെറുതും വലുതുമായ വയലേലകളും, ചേര വളഞ്ഞുപോകുന്നതുപോലെ നീണ്ടുവളഞ്ഞ ഗ്രാമപാതകളും, അനാർഭാടമായ വീടുകളും — ഇവയെല്ലാം ഗ്രാമീണർ ഹൃദയത്തിന്റെ ആഴങ്ങളിൽ നിധിപോലെ സൂക്ഷിച്ചിരുന്ന ഗ്രാമദൃശ്യങ്ങളായിരുന്നു.

എന്നാൽ ഇന്നതിനെല്ലാം ചെറിയ മാറ്റങ്ങൾ വന്നിരിക്കുന്നു.

ഇന്ന് നാണ്യവിളയായ റബ്ബർ കുന്നുകൾക്ക് കുടചൂടുകയും താഴ്‌വാരങ്ങളിലേക്ക് ഇറങ്ങിവന്ന് ആധിപത്യം സ്ഥാപിക്കുകയും ചെയ്തിരിക്കുന്നു. ഗ്രാമീണ റോഡുകളിൽ പലതും ടാർ റോഡുകളായി മാറിയിരിക്കുന്നു. ഗ്രാമീണ ഭവനങ്ങൾ അതിവേഗം സിമന്റ് കോൺക്രീറ്റ് കെട്ടിടങ്ങളായി രൂപാന്തരം പ്രാപിച്ചുകൊണ്ടിരിക്കുന്നു.

കർഷകഹൃദയത്തിനും സാരമായ വ്യതിയാനങ്ങൾ സംഭവിച്ചിരിക്കുന്നു. വിലപിടിച്ച മണ്ണ് — പ്രകൃതിയുടെ വരദാനം — ഭൂമിയുടെ ഉപരിതലത്തിൽ നിന്ന് നഷ്ടപ്പെട്ടുകൊണ്ടിരിക്കുകയാണ്. പ്രകൃതിയുടെ സന്തുലിതാവസ്ഥ, കാലം കനിഞ്ഞനുഗ്രഹിച്ച ആ അത്ഭുത പ്രതിഭാസം, ക്രമേണ ഇല്ലാതായിക്കൊണ്ടിരിക്കുന്നു.

ഇവിടെ തോൽക്കുന്നതാരാണ് — പ്രകൃതിയോ, മനുഷ്യനോ?

ഭൂപ്രകൃതി

ഭരണിക്കാവ് ബ്ലോക്ക് പഞ്ചായത്ത് ആലപ്പുഴ ജില്ലയുടെ തെക്കുകിഴക്കൻ ഭാഗത്താണ് സ്ഥിതി ചെയ്യുന്നത്. ഈ പ്രദേശം കൊല്ലം, പത്തനംതിട്ട ജില്ലകളുമായി അതിർത്തി പങ്കിടുന്നു.

തെക്കേക്കര, ചെട്ടികുളങ്ങര, കൃഷ്ണപുരം, ഓച്ചിറ, തഴവ, ശൂരനാട് വടക്ക്, പള്ളിക്കൽ, പന്തളം, വെൺമണി, തഴക്കര എന്നിവയാണ് ബ്ലോക്ക് പഞ്ചായത്തിന് ചുറ്റുമുള്ള ഗ്രാമപഞ്ചായത്തുകൾ.

പ്രദേശത്തിന്റെ പ്രധാന ചരിവ് പൊതുവെ കിഴക്കുനിന്ന് പടിഞ്ഞാറോട്ടാണ്. എന്നാൽ കിഴക്കൻ ഭാഗങ്ങളിൽ ഭൂപ്രകൃതിയുടെ ചരിവ് വടക്കോട്ടും തെക്കോട്ടും കാണപ്പെടുന്നു.

ബ്ലോക്ക് പഞ്ചായത്തിന്റെ കിഴക്കൻ ഭാഗത്തുള്ള പാലമേൽ, നൂറനാട് ഗ്രാമപഞ്ചായത്തുകളിൽ സമുദ്രനിരപ്പിൽ നിന്ന് ഏകദേശം 20 മീറ്റർ മുതൽ 90 മീറ്റർ വരെ ഉയരമുള്ള നിരവധി കുന്നുകൾ കാണപ്പെടുന്നു. ഈ പഞ്ചായത്തുകളിൽ നിന്ന് പടിഞ്ഞാറോട്ട് ചുനക്കര, താമരക്കുളം പഞ്ചായത്തുകളിലേക്ക് എത്തുമ്പോഴേക്കും ഭൂപ്രകൃതിയിലെ ഉയർച്ചതാഴ്ചകൾ ക്രമേണ കുറഞ്ഞുവരുന്നു.

വള്ളികുന്നം, ഭരണിക്കാവ് ഗ്രാമപഞ്ചായത്തുകളുടെ കിഴക്കൻ ഭാഗങ്ങളിലും സമാനമായ ഭൗതിക സവിശേഷതകൾ കാണാം. ഈ പഞ്ചായത്തുകളുടെ പടിഞ്ഞാറൻ ഭാഗങ്ങൾ തീരസമതലവുമായി ചേരുന്നു.

ബ്ലോക്ക് പഞ്ചായത്ത് പ്രദേശത്തിന്റെ ഉയരം സമുദ്രനിരപ്പിൽ നിന്ന് ഏകദേശം 15 മീറ്റർ മുതൽ 90 മീറ്റർ വരെ വ്യത്യാസപ്പെടുന്നു.

ഭൂപ്രകൃതിയുടെ അടിസ്ഥാനത്തിൽ ഈ ബ്ലോക്ക് പഞ്ചായത്ത് പ്രദേശത്തെ സൗകര്യാർത്ഥം മൂന്ന് ഭൂമിശാസ്ത്ര മേഖലകളായി തിരിക്കാം:

1. കിഴക്കൻ മേഖല — ഇടത്തരം കുന്നുകളും താഴ്‌വാരങ്ങളും

കിഴക്കൻ മേഖലയിൽ മിതമായ ഉയരമുള്ള കുന്നുകളും അവയ്ക്കിടയിലുള്ള താഴ്‌വാരങ്ങളും കാണപ്പെടുന്നു. പാലമേൽ, നൂറനാട് പ്രദേശങ്ങളിൽ ഈ ഭൂപ്രകൃതി പ്രത്യേകമായി പ്രകടമാണ്.

2. മധ്യമേഖല — ചെറിയ കുന്നുകളും താഴ്‌വാരങ്ങളും

മധ്യമേഖലയിൽ താരതമ്യേന ചെറിയ കുന്നുകളും താഴ്‌വാരങ്ങളും ഉൾപ്പെടുന്നു. കിഴക്കൻ മേഖലയെ അപേക്ഷിച്ച് ഇവിടെ ഉയർച്ചതാഴ്ചകളിലെ വ്യത്യാസം കുറവാണ്.

3. പടിഞ്ഞാറൻ മേഖല — തീരസമതലം

പടിഞ്ഞാറൻ മേഖല തീരസമതലത്തിന്റെ ഭാഗമാണ്. കിഴക്കൻ പ്രദേശങ്ങളെ അപേക്ഷിച്ച് താരതമ്യേന നിരപ്പായ ഭൂപ്രകൃതിയും കുറഞ്ഞ ഉയരവുമാണ് ഈ മേഖലയ്ക്കുള്ളത്.